ކުންފުނީގެ ތަޢާރަފް

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ވެރިކަމުގެ ފުރަތަމަ 14 ހަފްތާގެ މަގުޗާޓުގައި ހިމަނުއްވާފައިވާ "ދިވެހި ކޮންމެ ރައްޔިތަކަށް އާސަންދަ ސްކީމްގެ ދަށުން އަހަރަކު 2 ފަހަރު މެޑިކަލް ޗެކަޕް ހެދުމުގެ މަގުފަހިކޮށްދިނުމަށް ޚާއްޞަ ސިޔާސަތެއް އެކުލަވާލައި ތަންފީޒުކުރަން ފެށުން" މިވަޢުދުގެ ދަށުން އެކިއެކި އުމުރުފުރާތަކަށް އަމާޒުކުރެވިގެން 1 ޖަނަވަރީ 2024 އިން ފެށިގެން ސަރުކާރުގެ ޞިއްޙީ ޚިދުމަތްދޭ މަރުކަޒުތައް މެދުވެރިކޮށް މެޑިކަލް ޗެކަޕް ހެދުމުގެ އިންތިޒާމް ވަނީ ހަމަޖެހިފައެވެ.

01 އޮގަސްޓް 2023 ގައި 'މައި އާސަންދަ' ޕޯޓަލް ވަނީ ތަޢާރަފްކޮށް ބޭނުންކުރަން ފަށާފައެވެ. މިއާއެކު، ހެލްތްކެއާ ފައިނޭންސިންގ އަށް ސަރުކާރުގެ އެހީތެރިކަމަށް އެދި އެޕްލިކޭޝަން ހުށަހަޅަން އަޅުގަނޑުމެންގެ ފްރަންޓް އޮފީހަށް ނުވަތަ ވިރަ ކައުންޓަރުތަކަށް ރައްޔިތުން އަންނަން ނުޖެހި، މި ޕޯޓަލް (https://my.aasandha.mv) މެދުވެރިކޮށް އޮންލައިންކޮށް ފޯމު ހުށަހެޅުމުގެ ފުރުސަތު ރައްޔިތުންނަށްވަނީ ފަހިވެފައެވެ. އަދި އެޕްލިކޭޝަން ސްޓޭޓަސް ވެސް ކޮންމެ ވަގުތެއްގައި ވެސް ޕޯޓަލް މެދުވެރިކޮށް ޗެކް ކުރެވޭނެއެވެ.

ބޭސް ފަރުވާއާއި ގުޅިގެން ދަޢުލަތުގެ އެހީއަށް އެދޭ ރައްޔިތުންނަށް، "އޯގާތެރި ސަރުކާރު" ޝިއާރުގެ ދަށުން، ލުއިފަސޭހަ އަވަސް ޚިދުމަތްތަކެއް ދިނުމުގެ އަމާޒަށް ވާސިލުވުމަށްޓަކައި، ބޭސްފަރުވާގެ ކަންކަމާ ގުޅިގެން ދެ އިދާރާއަކުން ރައްޔިތުންނަށް ދެމުން އައި ޚިދުމަތްތަކެއް، 'ވިރަ' ގެ ނަމުގައި، ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އާއި ގުޅިގެން އާސަންދަ މެދުވެރިކޮށް އެއް ފުރާޅެއްގެ ދަށުން ފޯރުކޮށްދޭން ފެށީ 24 ނޮވެމްބަރު 2022 ގައެވެ. މިއާއެކު އާސަންދަ ކުންފުނިން ފޯރުކޮށްދެމުންދާ އާސަންދަ އަދި މެރަނާ ސްކީމްގެ ޚިދުމަތްތަކާއި އެންސްޕާގެ ދަށުން ފޯރުކޮށްދެމުންދާ މެޑިކަލް ވެލްފެއަރ ޚިދުމަތްތައް އެއްތަނަކުން ލިބިގަތުމުގެ ފުރުޞަތު ރައްޔިތުންނަށް މިވަނީ ފަހިވެފައެވެ. މި ބަދަލާއެކު ކުރިން އާސަންދަ އަދި މެޑިކަލް ވެލްފެއަރއަށް އެދި ވަކިވަކިން ފޯމު ހުށަހެޅުމުގެ ބަދަލުގައި، އެހީ ބޭނުންވާ ފަރާތުން ހުށަހަޅަން ޖެހޭނީ އެންމެ ފޯމެކެވެ. އަދި އެހީތެރިކަމަށް އެދި ހުށަހަޅާ ފަރާތުގެ ޙާލަތު ބަދަލުނުވާހާ ހިނދަކު އިތުރު ފޯމެއް ހުށަހަޅާކަށް ނުޖެހޭނެއެވެ. ކުރިން ދެ އިދާރާއަކުން ހޯދަންޖެހޭގޮތަށް އޮތް މި ޚިދުމަތްތައް އެއް ތަނަކުން ލިބުމަކީ ރައްޔިތުންނަށް ލިބިގެންދާނެ ވަރަށްބޮޑު ލުއި ފަސޭހައެކެވެ. އަދި އެތައްފަހަރަކު ލިޔެކިޔުންތައް ހުށަހެޅުމުގެ ބަދަލުގައި އެއްފަހަރު ލިޔެކިޔުން ހުށަހަޅާގޮތަށް ހަމަޖެހިގެން ދިއުމަކީވެސް ޚިދުމަތް ހޯދުމުގައި ތަކުލީފު ކުޑަވެ، ޚިދުމަތް ލިބުން އަވަސްވެގެންދިޔަ ބަދަލެކެވެ.

އާސަންދައިން ޚިދުމަތެއް ހޯދުމުން ފޯނަށް ނޮޓިފިކޭޝަން އަންނަގޮތަށް އެސްއެމްއެސް ނޮޓިފިކޭޝަން ސަރވިސް ތަޢާރަފުކުރީ އާސަންދަ ކުންފުނީގެ 10 ވަނަ އަހަރީދުވަސް ފާހަގަކުރުމުގެ ގޮތުން 24 ޑިސެމްބަރު 2021 ގައި ބޭއްވި ހަފްލާގައެވެ. މި ޚިދުމަތާއެކު، އާސަންދައިގެ ވިނަވި ޕޯޓަލް މެދުވެރިކޮށް ޚިދުމަތްދޭ މަރުކަޒުތަކުން ޚިދުމަތް ލިބިގަތުމުން، ހޯދި ޚިދުމަތާ، ޚިދުމަތް ހޯދި ތަނާއި ޚަރަދުވީ ފައިސާގެ ޢަދަދު، ޚިދުމަތް ހޯދި ފަރާތުގެ މޮބައިލް ނަންބަރަށް ޓެކްސްޓް މެސެޖެއްގެ ގޮތުގައި ފޮނުވަން ފެށުނެވެ.

- 27 ސެޕްޓެމްބަރު 2020 ގައި އާސަންދަަ މޮބައިލް އެޕްލިކޭޝަން ލޯންޗްކުރެވުނު. 'އާސަންދަ' ގެނަމުގައި ތަޢާރަފްކޮށްފައިވާ މި އެޕް ޕްލޭ ސްޓޯރުން ޑައުންލޯޑް ކުރެވޭނެ. އެޕް އަމާޒުކޮށްފައިވަނީ އާސަންދަ ސްކީމްގެ ޚިދުމަތް ހޯދާ ދިވެހި އެންމެހާ ރައްޔިތުންނަށް. ކޮންމެ ދިވެހި ރައްޔިތަކަށްވެސް މި އެޕްގައި ރަޖިސްޓަރވެވޭނެ. އެޕް ޑައުންލޯޑްކޮށް ރެޖިސްޓަރވުމުން، އާސަންދަ ސްކީމްގެ ދަށުން ޚިދުމަތް ފޯރުކޮށްދޭ ތަންތަނުގެ ތެރެއިން އާސަންދައިގެ އައު އޮންލައިން ޕޯޓަލް "ވިނަވި" ބޭނުންކުރާ ހުރިހާ ތަނަކުން، އެމީހަކު ހޯދާ ޚިދުމަތްތަކުގެ ތަފްޞީލު އެޕުން ފެންނަން ހުންނާނެ. ޑޮކްޓަރުން ލިޔެދެއްވާ އީ-ޕްރިސްކްރިޕްޝަން ނުވަތަ އިލެކްޓްރޯނިކް ބޭސް ސިޓީތައްވެސް އެޕް މެދުވެރިކޮށް ބަލާލެވޭނެ. އަދި، ނުހޯދާ ޚިދުމަތެއް ލިސްޓްކޮށްފަ ވާނަމަ އެޕް މެދުވެރިކޮށް އެކަން ރިޕޯޓްކުރުމުން އާސަންދައިން އެކަން ތަޙުޤީޤުކުރާނެ. މި އެޕް ތަޢާރަފްކުރުމުގެ އެންމެ ބޮޑު މަޤްޞަދަކީ އާސަންދަ ސްކީމްގެ ކަންކަން ވީހާވެސް ދެފުށްފެންނަ ގޮތަކަށް ކުރިއަށް ގެންދިއުން. އަދި ތަޢާރަފްކުރީ ހަމައެކަނި އެންޑްރޮއިޑް އެޕް ނަމަވެސް ކައިރި މުސްތަޤްބަލެއްގައި އައި.އޯ.އެސް އެޕް ވެސް ތަޢާރަފްކުރުމުގެ މަސައްކަތްވެސް ދަނީ ކުރެވެމުން.

ސްރީލަންކާ، އިންޑިއާ އަދި މެލޭޝިއާގައި ދިރިއުޅޭ ދިވެހި ރައްޔިތުންނަށް ޞިއްޙީ ޚިދުމަތް ހޯދުމުގައި މާލީގޮތުން ލުއިފަސޭހަ ގޮތްތަކެއް ހޯދައިދިނުމުގެ މަޤުޞަދުގައި 'މެރަނާ' ސްކީމް ގެ ނަމުގައި އާސަންދަ ކުންފުނިން 2019 ވަނަ އހަރަުގެ އޭޕްރީލް މަހު ސްކީމެއް ތަޢާރަފްކުރެވުނު. އިންޑިއާ، ސްރީލަންކާ އަދި މެލޭޝިއާގައި ދިރިއުޅޭ ދިވެހި ރައްޔިތުންގެ ތެރެއިން 'މެރަނާ' ސްކީމަށް ރަޖިސްޓަރކުރާ ފަރާތްތަކަށް ދިވެހި ސަރުކާރުން ބޭސްފަރުވާގެ މާލީ އެހީ ލިބިގެންދަނީ، މި ސްކީމްގެ މިންގަނޑުތަކުގެ ތެރެއިން. މި ތިން ޤައުމުގައި ދިރިއުޅޭ ދިވެހި ރައްޔިތުންގެ ގޮތުގައި މާނަކުރެވެނީ ދިގު މުއްދަތަށް (މަދުވެގެން 6 މަސްދުވަހަށް) ދިރިއުޅުމަށް އެޤައުމަކުން ކަނޑައަޅާފައިވާ ވިސާ ލިބިފައިވާ ފަރާތްތައް.

- ކޮމްޕެނީގެ ޚިދުމަތްތައް ފުޅާކުރުމުގެ ގޮތުން ކުރެވޭ މަސައްކަތްތަކުގެ ތެރެއިން ހުޅުމާލެ ހޮސްޕިޓަލު ހިންގުން އާސަންދަ ކޮމްޕެނީއާ 3 އެޕްރީލް 2016 ގައި ހަވާލުކުރެވުނު. މި ބަދަލާއެކު، ހުޅުމާލެ ހޮސްޕިޓަލަކީ ކުރިއަރާފައިވާ ފެންވަރު ރަގަޅު ސްޕެޝަލިސްޓް ފަރުވާދޭ މަރުކަޒެއްގެ ގޮތުގައި ތަރައްޤީކޮށް ހޮސްޕިޓަލަށް ބޮޑެތި ރަނގަޅު ބަދަލުތަކެއް އާސަންދައިން ވަނީ ގެނެސްފަ. 2016 އިން 2019 ޑިސެމްބަރު 31 ގެ ނިޔަލަށް ހުޅުމާލެ ހޮސްޕިޓަލު ހިންގަމުން އައީ އާސަންދަ ކުންފުނީގެ ދަށުން.

- 1 މާރޗް 2015އިން ފެށިގެން އާސަންދަ ކޮމްޕެނީ ލިމިޓެޑްގެ 100% ހިއްސާ ސަރުކާރުން ގަނެ ސައްތައިންސައްތަ ސަރުކާރު ކުންފުންޏެއްގެ ގޮތުގައި ހިންގުން ބަދަލުކުރެވުނު.

- 'އާސަންދަ' ސްކީމް އިތުރަށް ފުޅާކޮށް "ހުސްނުވާ އާސަންދަ"ގެ ގޮތުގައި އާ ސްކީމަކަށް ސަރުކަރުން ބަދަލުކުރީ ފެބްރުއަރީ 2014ގައި. މި އާ ސްކީމްގެ ދަށުން ކޮންމެ ރައްޔިތަކަށް އަހަރަކަށް ކަނޑައެޅިފައިވާ އެއް ލައްކަ ދިވެހި ރުފިޔާގެ ލިމިޓް އުވާލާ، ކޮންމެ ދިވެހި ރައްޔިތަކަށްވެސް ސްކީމްގެ ތެރެއިން ކަވަރުކުރާ ހުރިހާ ޞިއްޙީ ޚިދުމަތްތަކެއް އެއްވެސް ލިމިޓަކާނުލާ ބޭނުންކުރެވޭނެ ނިޒާމް ހަމަޖެހިގެންދިޔަ. ހުސްނުވާ އާސަންދަ ސްކީމްގެ މަގްޞަދަކީ ހުރިހާ ދިވެހި ރައްޔިތުންނަށް ޞިއްޙީ ޚިދުމަތްތައް، ރާއްޖޭގެ ޚިދުމަތްދޭ މަރުކަޒުތަކުން އަދި ރާއްޖެއިން ލިބެންނެތް ޚިދުމަތްތައް ރާއްޖެއިންބޭރުގެ ޞިއްޙީ ޚިދުމަތްދޭ މަރުކަޒުތަކުން، ފަސޭހަކަމާއެކު އަމިއްލަ ޖީބުން މާބޮޑު ހޭދައެއް ކުރަން ނުޖެހި ޞިއްޙީ ޚިދުމަތް ހޯދުމުގެ ފުރުސަތު ފަހިކޮށްދިނުން. މީގެ އިތުރުން ރާއްޖެއިން ބޭރުގައި ދިރިއުޅޭ ރައްޔިތުންނަށް އިމަޖެންސީ ހާލަތްތަކުގަ އެގައުމުތަކުން ޞިއްޙީ ފަރުވާ ލިބޭނެގޮތް ހަމަޖައްސައިދިނުމަށް. އާސަންދަ ސްކީމްގެ ދަށުން ކަވަރުނުކުރާ ގިނަ ޚިދުމަތްތަކެއް ހުސްނުވާ އާސަންދައިގެ ދަށުން ކަވަރުކުރަން ފެށުނު. އެގޮތުން: އިމަރޖެންސީ ހާލަތްތަކުގައި ބަލިމީހާ ޓްރާންސްޕޯޓްކުރުމުގެ ޚަރަދާ 30 އަހަރުން މަތީގެ މީހުންނާއި 18 އަހަރުން ދަށުގެ ކުޑަކުދިންނަށް އަހަރަކު އެއްފަހަރު މެޑިކަލް ޗެކްއަޕްގެ ހެދުމުގެ ޚަރަދާ މާބަނޑުވުމާ ގުޅިގެން ހޯދާ ހުރިހާ ފަރުވާއެއްގެ ޚަރަދާއި ޚާއްސަ އެހީއަށް ބޭނުންވާ ފަރާތްތަކާއި ފުރާނައަށް ނުރައްކާވާ ބަލިތަކަށް ފަރުވާހޯދާ ފަރާތްތަކުގެ ބޭސްފަރުވާގެ ހުރިހާ ޚަރަދެއް ކަވަރުކުރަން ފެށުނު.

- ކުރިން ބޭނުންކުރެވުނު ޞިއްޙީ އިންޝުއަރެންސް ސްކީމް "މަދަނަ" އަކީ ފަގީރު ހާލަތުގައި ދިރިއުޅޭ ރައްޔިތުންނާއި، އުމުރުން ދުވަސްވީ މީހުން އަދި ސިވިލް ސަރވެންޓުންނަށް އަމާޒުކޮށްގެން ކުރިއަށް ގެންދިޔަ ޞިއްޙީ އިންޝުއަރެންސް ސްކީމެއް. އޭގެ ބަދަލުގައި ހުރިހާ ރައްޔިތުން ބައިވެރިކުރެވޭ ގޮތަށް ޔުނިވަރސަލް ހެލްތް އިންޝުއަރެންސް ސްކީމް "އާސަންދަ" 1 ޖެނުއަރީ 2012 ގައި ސަރުކާރުން ތަޢާރަފު ކުރި. ހުރިހާ ރައްޔިތުންނަށްވެސް ލުއިފަސޭހަކަމާއެކު ޞިއްޙީ ޚިދުމަތް ލިބުމުގެ ފުރުސަތު ހޯދައިދިނުމަށް ތަޢާރަފްކުރެވުނު މި ސްކީމުގެ ދަށުން އިން-ޕޭޝަންޓް އަދި އައުޓް-ޕޭޝަންޓް ފަރުވާއަށް ކޮންމެ ރައްޔިތަކަށްވެސް އަހަރަކަށް ޖުމްލަ އެއް ލައްކަ ރުފިޔާގެ ލިމިޓެއް އަދި އައުޓްޕޭޝަންޓް ފަރުވާއަށް ދިހަ ހާސް ރުފިޔާގެ ލިމިޓެއް ކަނޑައެޅުނު. އަދި ސައްޚަ އައި.ޑީ ކާޑެއް އޮންނަ ކޮންމެ ދިވެހި ރައްޔިތަކަށް ސްކީމުގެ ދަށުން ޞިއްޙީ ފަރުވާ ލިބޭނެ އިންތިޒާމް ހަމަޖެހިގެންދިޔަ.

- ދިވެހިރާއްޖޭގެ އިޖްތިމާއީ ޞިއްޙީ އިންޝުއަރެންސްގެ ޤައުމީ ނިޒާމު، "އާސަންދަ" ސްކީމުގެ ކަންތައްތައް ބެލެހެއްޓުމަށްޓަކައި، އެލައިޑް އިންޝުއަރެންސް ކޮމްޕެނީއާ ސަރުކާރާއެކު ޖޮއިންޓް ވެންޗަރއެއްގެ ގޮތުގައި 20 ޑިސެމްބަރު 2011 ގައި އާސަންދަ ކޮމްޕެނީ ލިމިޓެޑް ޤާއިމްކުރެވުނު.